大鐘樓（The Clock Tower）係香港舊時一座鐘樓，1908年拆咗。個鐘樓響香港島中環，皇后大道中同必打街（今日畢打街）交界。古蹟古物辦事處叫佢做畢打街鐘樓（Pedder Street Clock Tower）。
雖然大鐘樓畀人拆咗，但係香港人響20世紀初重係叫大鐘樓一帶做「大鐘樓」。雖然大鐘樓無咗，過咗差唔多廿年，響附近有另一個鐘樓出現。1926年當時全香港最高建築物告羅士打行起好，個行就有座告羅士打鐘樓，代替咗大鐘樓嘅地位。香港日治時期，「大鐘樓」一帶畀日本仔改名做「昭和廣場」。