新會喺中國廣東省中部，珠三角地區西南部，原本係個縣，後來升格做縣級市。2002年成為江門市的一個市轄區。新會係廣東歷史文化名城，區政府喺會城街道。
新會位處中國南部沿岸，介乎北緯二十二度五分四十三秒至二十二度四十分二十四秒、東經一百一十二度四十七分十三秒至一百一十三度十五分二十四秒之間，時區快過協調世界時八個鐘（即UTC+8）。東西相距46.6公里，南北相距55公里。 新會北部、東北部同江門市接界，東部同中山市接界，東南部同斗門區接界，南面黐住黃茅海，西南同台山市接界，西部同開平市接界，西北同鶴山市接界。海岸線長14.9公里，總面積1349.1平方公里。
新會位於華南地區，屬海洋性亞熱帶季風氣候，四季唔多明顯。全年平均氣溫21.8攝氏度，平均相對濕度81％。每年四月中旬至十一月中旬係新會嘅夏天，天氣炎熱潮濕，朝早有時有驟雨同雷暴。晏晝最酷熱，平均超過攝氏31度，晚間就落返去攝氏26度咁上下。十一月中旬至下年四月中旬就係冬天，一般天陰，間中會有冷鋒經過，帶來乾燥嘅北風。氣溫有時會跌到攝氏10度以下，古兜山等高地，氣溫仲會降到去攝氏0度左右，出現結霜現象。
新會山脈分西北西南兩支，有大雁山脈、百峰山脈，都係由鶴山皂幕山脈發脈。東南係牛牯嶺山地。山地佔新會總面積嘅35.84％。新會位處歐亞板塊之內，遠離板塊邊緣，所以發生強烈地震嘅機會好微。境內偶然會感覺到地殼震動，不過都唔會造成任何傷亡或者損壞。